مقبول عامر
پھر وہی ہم ہیں وہی تیشہء رسوائی ہے
دودھ کی نہر تو پرویز کے کام آئی ہے
اپنا مسلک ہی نہیں زخم دکھاتے پھرنا
جانتا ہوں کہ ترے پاس مسیحائی ہے
سانحہ پھر کوئی بستی میں ہوا ہے شاید
شام روتی ہوئی جنگل کی طرف آئی ہے
صبح دم دل کے دریچوں میں پہ یہ ہلکی دستک
دیکھ تو بادِ صبا کس کی خبر لائی ہے
کچھ تو ہم مائل گریہ تھے بڑی مدت سے
کچھ تری یاد بڑی دیر کے بعد آئی ہے
دور اڑتے ہیں فضاوں میں پرندے عامر
میری کشتی کسی ساحل کے قریب آئی ہے
یہی چنار یہی جھیل کا کنارا تھا
یہیں کسی نے میرے ساتھ دن گزارا تھا
نظر میں نقش ہے صبحِ سفر کی ویرانی
بس ایک میں تھا اور اک صبح کا ستارا تھا
مرے خلاف گواہی میں پیش پیش رہا
وہ شخص جس نے مجھے جرم پر ابھارا تھا
خراج دیتا چلا آرہا ہوں آج تلک
میں ایک روز زمانے سے جنگ ہارا تھا
مجھے خود اپنی نہیں اس کی فکر لاحق ہے
بچھڑنے والا بھی مجھ سا ہی بے سہارا تھا
زمیں کے کام اگر میری دسترس میں نہیں
تو پھر زمیں پہ مجھے کس لیے اتارا تھا
میں جل کے راکھ ہوا جس الاو میں عامر
وہ ابتدا میں سلگتا ہوا شرارہ تھا
آنکھوں کے خواب زار کو تاراج کر گئی
پاگل ہوا چلی تو حدوں سے گزر گئی
دو گام تک ہی سبز مناظر تھے اس کے بعد
اک دشتِ بیکراں تھا جہاں تک نظر گئی
پھر شام کی ہوا نے تری بات چھیڑ دی
پھر میرے چار سو تری خوشبو بکھر گئی
پل بھر وہ چشمِ تر سے مجھے دیکھتا رہا
پھر اس کے آنسوؤں سے میری آنکھ بھر گئی
دو سائے اک مینار کے نیچے بہم ہوئے
اور دھوپ کوہسار کے پیچھے اتر گئی
میں دشت میں بھٹکتا رہا اور ہوائے گل
مجھ کو تلاش کرتی ہوئی در بدر گئی
لہجے میں وہ اثر تھا کہ باوصفِ اختلاف
جو بات منہ سے نکلی دِلوں میں اتر گئی
سلگ رہی ہے فضا سائباں کے ہوتے ہوئے
زمیں پہ اتنے ستم آسماں کے ہوتے ہوئے
کسی بھی گھاٹ نہ اُترا مرا سفینۂ دل
ہوا کے رخ پہ کھلے بادباں کے ہوتے ہوئے
کہ جیسے اُس کو فضاؤں سے خاص نسبت ہو
پرندہ اڑتا رہا آشیاں کے ہوتے ہوئے
مہ و نجوم کی جانب نظر اُٹھے کیسے!
اس نے اپنے رنگ بھرے خاکداں کے ہوتے ہوئے
عجب طرح کا مسافر تھا اپنا عامر بھی
اکیلا چلتا رہا کارواں کے ہوتے ہوئے
زمین خشک، فلک بادلوں سے خالی ہے
اک ایک بوند کا دشتِ نظر سوالی ہے
یہ جنگِ صدق و صفا یادگار ٹھہرے گی
عدو ہے تیغ بکف، میرا ہاتھ خالی ہے
کوئی پڑاو نہیں وقت کے تسلسل میں
یہ ماہ سال کی تقسیم تو خیالی ہے
سفر کی دھوپ اڑا لے گئی ہے رنگ تمام
نہ میرے زخم نہ تیرے لبوں پہ لالی ہے
تمہارا حسن ہی یکتا نہیں زمانے میں
خدا گواہ مرا عشق بھی مثالی ہے
منتظر رہنا مری جان بہار آنے تک
رنگ شاخوں سے گلابوں میں اتر جانے تک
ایک تتلی ہے کہ بے چین اڑی پھرتی ہے
تیرے آنگن سے مرے دل کے پری خانے تک
دشتِ بے آب سے پوچھو کہ وہاں کے اشجار
کن مراحل سے گزرتے ہیں نمو پانے تک
ہم تو چپ چاپ چلے آئے بحکمِ حاکم
راستہ روتا رہا شہر سے ویرانے تک
تشنگی اپنے نصیبوں میں لکھی تھی ورنہ
فاصلہ کچھ بھی نہ تھا ہونٹ سے پیمانے تک
چند لمحوںمیںسبھی عکس نکھر آئیں گے
دھند کا راج ہے بس دھوپ نکل آنے تک
یہ عہد کرب مرے نقش کو ابھارے گا
زمانہ اس کو مرے نام سے پکارے گا
ازل سے آدم و فطرت میں برسرِ پیکار
خبر نہیں ہے کہ یہ جنگ کون ہارے گا
ہمیں یہ غم ہے نگارِ وطن کہ ہم نہ رہے
تو جانے کون ترا قرضِ غم اتارے گا
ترے وصال سے آباد تھی مری دنیا
ترا فراق مری عاقبت سنوارے گا
مجھے یقین ہے عامر کہ ایک روز خدا
اسی زمیں پہ بہشت بریں اتارے گا
خوشبوؤں کی بارش تھی، چاندنی کا پہرہ تھا
میں بھی اُس شبستاں میں ایک رات ٹھہرا تھا
تو مری مسیحائی، جان! کس طرح کرتا
تیری جھیل آنکھوں سے میرا زخم گہرا تھا
میں نے اس زمانے میں تیرے گیت گائے ہیں
تیرا نام لینا بھی جب گناہ ٹھہرا تھا
اس گھڑی نبھایا تھا اس نے وصل کا وعدہ
جب تمام رستوں پر چاندنی کا پہرہ تھا
رنگ یاد ہے اس کا شام کے دھندلکے میں
آنسووں سے میں تر چہرہ کس قدر سنہرا تھا
دل دریا کے پار اک ایسی وادی تھی
جس میں سارے جذبوں کی آزادی تھی
بوٹے قد کی کومل سی شہزادی تھی
جس نے سارے شہر میںدھوم مچا دی تھی
آگ بجھا کر بھی کچھ ہاتھ نہیں آیا
اک جھونکے نے ساری راکھ اڑا دی تھی
دریا پر پہنچا تو کتنا رویا تھا
وہ جس نے صحرا میں عمر گنوا دی تھی
میں اس کے انبوہ میں اکثر کھو جاتا
میرے اندر اک ایسی آبادی تھی
میری چبھتی نظروں نے اک دن عامر
اُس پیکر کو عریانی پہنا دی تھی
فیض احمد فیض کی خدمت میں
بادشاہوں کا بادشاہ تھا وہ
ہم فقیروں کی خانقاہ تھا وہ
ظلمتِ شب میں صبح کا تارہ
دشتِ غم میں نشانِ راہ تھا وہ
خوبصورت بھی ، خوب سیرت بھی
جھیل میں جیسے عکسِ ماہ تھا وہ
جو اسے سنگسار کرتے رہے
وہ بھی کہتے ہیں بے گناہ تھا وہ
آدمی بھی بلا کاتھا عامر
اور شاعر تو بے پناہ تھا وہ
Theme by Danetsoft and Danang Probo Sayekti inspired by Maksimer