Mahmood Sham

آج کیوں ہم سے لپٹتی ہے صبا
تونے اے دوست بلایا تو نہیں

دل کے آنگن میں بھٹکتے سائے
کچھ یہاں تو نے گنوایا تو نہیں

تیرے چہرے پہ تغیر کیوں ہے
حال دل ہم نے سنایا تو نہیں

شام ڈھلتی ہے تو میں سوچتا ہوں
زندگی موت کا سایا تو نہیں

شام جی کھوئے سے رہتے ہو سدا
کیا کوئی دل میں سمایا تو نہیں

پھر موسم خیال کی ٹھنڈی ہوا چلی
پھر پھیلنے لگی تری خوشبو گلی گلی

دل کیف انتظار میں یوں ڈھل کے رہ گیا
پانی میں جیسے گھل گئی ہو برف کی ڈلی

کتنے مکان جھانکتی پھرتی ہے چاندنی
کیا جانے کس کو ڈھونڈتی پھرتی ہے منچلی

تیرا خیال گرمیوں کی صبح سا حسیں
یادوں میں تیری سردیوں کی دھوپ ہے ڈھلی

ویراں ہیں ایک عمر سے آنکھوں کے گل کدے
اس کو تو یاد آئے بھی مدت ہی ہو چلی

شب کو تو شام چاند ستارے بھی ساتھ تھے
پڑنے لگی جو دُھوپ تو اک اک نے راہ لی

دل میں یوں سما رہے ہیں!
سانس خوشبو سی پا رہے ہیں

چاندنی شب ہے چاند تارے
اپنے جوبن پہ آ رہے ہیں

تیری یادوں کے تند جھونکے
دل کی شمعیں بجھا رہے ہیں

راستے پاؤں چومتے ہیں
ہم تیری سمت آ رہے ہیں

نہر کے ہونٹ کانپتے ہیں
کون طوفان آ رہے ہیں

شام پیڑوں کے سائے کیسے
چاندنی میں نہا رہے ہیں

اب کہاں وہ لوگ جن کے نام سے
بجلیاں اٹھتی تھیں ہر ایک گام سے

زندگی ہے پیڑ کا سایا نہیں
کیسے بیٹھو گے یہاں آرام سے

بند کرکے اکثر ان آنکھوں کے پٹ
تجھ کو دیکھا دیدہ اوہام سے

اس کے گھر سے آئی ہے ٹھنڈی ہوا
روشنی بہتی ہے اس کے بام سے

چاند کس کس کو پلائے چاندنی
لاکھ پاگل پھر رہے ہیں شام سے

جب بھی تیرے ستم کی بات چلی
میرے ہمراہ کائنات چلی

چاند کی جستجو میں نکلے تھے
کہکشاں بھی ہمارے ساتھ چلی

چاندنی جانے کیوں سمٹ سی گئی
جب تیرے پیرہن کی بات چلی

آج پھر آ گیا ہے موج میں دل
آج پھر باد حادثات چلی

دور تک گونجتے ہیں سناٹے
ہم کو لے کر کدھر حیات چلی

ٹہنیاں ہو گئیں برہنہ تن
یوں تیری بات ، پات پات چلی

لوگ ملنے لگے بہت، جب سے
رسم ترکِ تعلقات چلی

شام سے لوگ پھر رہے ہیں اداس
آج یہ کس ادا سے رات چلی

گونج رہی ہے دل میں یوں بھولی باتوں کی چاپ
جیسے وقت کے آنگن میں جاتے لمحوں کی چاپ

اس کے دھیان میں اے مورکھ! تو اپنا آپ بھلا
دل کی دھڑکن روک کے سن،اس کے قدموں کی چاپ

جانے دل کیوں ڈول اٹھتا ہے،بھر آتی ہے آنکھ
تھراتی ہے جب راہوں پر راہرووں کی چاپ

رینگتے لمحے، چیختی یادیں، ساں ساں کرتی رات
سونے گھر کا آنگن اور سوکھے پتوں کی چاپ

شام اندھیرے توڑ رہے ہیں دھیرے دھیرے سانس
پل پل بڑھتی جاتی ہے سورج کرنوں کی چاپ

دل کے پاتال سے ابھرا ہے کوئی
ذہن کے بام پہ آیا ہے کوئی

سوچ کے دائرے بتلاتے ہیں
دھیان کے جھیل میں اترا ہے کوئی

کبھی سایہ کبھی خوشبو بن کر
دل کے آنگن میں لہکتا ہے کوئی

پھر امڈ آئی ہے اوہام کی دھند
پھر سرراہ تمنا ہے کوئی

جگمگاتے ہیں منڈیروں پہ دیئے
شام سورج کہیں ڈوبا ہے کوئی

لے اڑا ایسے ترا دھیان مجھے
تو بھی لگتی ہے اب انجان مجھے

ہر صدا تیری صدا لگتی ہے
کیا بناتے ہیں میرے کان مجھے

ریت کا ڈھیر بنا دے نہ کہیں
دھوپ میں تپتا بیابان مجھے

سنسناتے ہیں در و بامِ خیال
کر گیا کون یہ ویران مجھے

میں نے پہچان لیا تجھ کو
اب نہ کر مفت پریشان مجھے

رچ گئی جس میں ترے درد کی دھوپ
میں وہی شام ہوں پہچان مجھے

دل کا عجیب حال ہے تیری صدا کے بعد
جیسے کہ آسمان کا منظر گھٹا کے بعد

کیا کیا نقوش ہم نے ابھارے تھے ریت پر
باقی رہا نہ کوئی بھی وحشی ہوا کے بعد

بکھری ہوئی تھین چارسو پھولوں کی پتیاں
گلشن سنور سنور گیا تھا باد صبا کے بعد

اب تک فضا میں گونجتی ہے ایک نغمگی
سارا جہاں ہی رقص میں ہے اس صدا کے بعد

اب تک جلا رہی ہے ہمیں تہمتوں کی دھوپ
ہم تو اجاڑ ہو گئے فصل وفا کے بعد

یادیں، کھلے کواڑ، یہ مہکی ہوئی فضا
کون آ رھا ہے شام یہ ٹھنڈی ہوا کے بعد

حشر ظلمات سے دل ڈرتا ہے
اس گھنی رات سے دل ڈرتا ہے

برف احساس نہ گل جائے کہیں
سیل اوقات سے دل ڈرتا ہے

تو بھی اے دوست نہ ہو جائے جدا
اب ہر ایک بات سے دل ڈرتا ہے

یہ کڑی دھوپ، دہکتا سورج
سائے کے ساتھ سے دل ڈرتا ہے

ہائے وہ رینگتی تنہائی، جب
اپنی ہی ذات سے دل ڈرتا ہے

کیسے دیکھیں گے وہ اجڑی آنکھیں
اب ملاقات سے دل ڈرتا ہے

زخم ہو جائیں گے باغوں کے ہرے
شام برسات سے دل ڈرتا ہے