ادریس بابر

یونہی آتی نہیں ہوا مجھ میں

Verses

یونہی آتی نہیں ہوا مجھ میں
ابھی روشن ہے اک دیا مجھ میں

وہ مجھے دیکھ کر خموش رہا
اور اک شور مچ گیا مجھ میں

دونوں آدم کے منتقم بیٹے
اور ہوا ان کا سامنا مجھ میں

میں مدینے کو لوٹ آیا ہوں
یعنی جاری ہے کربلا مجھ میں

روشنی آنے والے خواب کی ہے
دن تو کب کا گزر چکا مجھ میں

اس اندھیرے میں جب کوئی بھی نہ تھا
مجھ سے گم ہو گیا خدا مجھ میں

Theme by Danetsoft and Danang Probo Sayekti inspired by Maksimer