Free Urdu Poetry Encyclopedia of Urdu Poetry

جو صبح و شام پئے انتظار گزرے ہیں
وہ گل بدست بہ رنگِ بہار گزرے ہیں

رہِ اُمید سے ہم بار بار گزرے ہیں
ہر ایک بار مگر شرمسار گزرے ہیں

سوال لب پہ، زباں بند، دل میں حیرانی
مقامِ دہر سے بے اختیار گزرے ہیں

ہجومِ آرزو رنگین کر گیا جن کو
وہی زمانے مِرے خوشگوار گزرے ہیں

ترے خیال سے دل کانپ کانپ جاتا ہے
کچھ ایسے حادثے، اے یادِ یار گزرے ہیں

خوشی تھی باعثِ غم، اور غم تھے وجہِ نشاط
ہمارے ایسے بھی کچھ غم گسار گزرے ہیں

بُتانِ وہم و گماں ہیںیہ حسرت و ارماں
ہم اِس دیار سے کتنی ہی بار گزرے ہیں

عجب نہیں کہ مری عاقِبت بنا جائیں
وہ مرحلے جو سرِ کوئے یار گزرے ہیں

بڑھاؤ اپنا یہ سرور، سبوئے شعر و غزل
تم ایسے کتنے یہاں بادہ خوار گزرے ہیں