Free Urdu Poetry Encyclopedia of Urdu Poetry

جز نغمہ رباب وفا اور کچھ نہیں
ظالم شکست دل کی صدا اور کچھ نہیں

لذت یہی سرور یہی زندگی یہی
دل میں ہجوم غم کے سوا اور کچھ نہیں

پس منظر چمن کو ذرا غور سے تو دیکھو
جز رنگ وبو بہار میں کیا اور کچھ نہیں

آئینہ جمال حقیقت ہے کائنات
سب کچھ وہی ہیں ان کے سوا اور کچھ نہیں

پاکیزگی حسن خیالات کی قسم
سب کچھ ہے عاشقی میں ردا اور کچھ نہیں

یوں دیکھتا ہوں جلوہ نقش و نگار دہر
جیسے نظر میں ان کے سوا اور کچھ نہیں

اب ہم ہیں اور مے کدہ حسن اے شکیل
شغل اپنا مے کشی کے سوا اور کچھ نہیں